டோனியின் விக்கெட்டை வீழ்த்தியதால் கனவு நனவானது; மகிழ்ச்சியில் டெல்லி பவுலர்

அவேஸ்கான்

மும்பை, ஏப்.13-

‛‛சென்னை அணியின் கேப்டனான டோனியின் விக்கெட்டை வீழ்த்தியதன் மூலம் கனவு நனவானது’’ என டெல்லி அணியின் இளம் வேகப்பந்து வீச்சாளர் அவேஸ்கான் கூறியுள்ளார்.

2 விக்கெட்

ஐ.பி.எல்., 14வது சீசனில் நடந்த இரண்டாவது போட்டியில் ‛தல’ டோனி தலைமையிலான சென்னை சூப்பர் கிங்ஸ், ரிஷாப் பண்ட்டின் டெல்லி கேப்பிட்டல்ஸ் அணிகள் மோதின. இதில் சென்னை அணி நிர்ணயித்த 188 ரன்களை 18.4 ஓவரில் விரட்டி டெல்லி அணி வெற்றி பெற்றது.

அவேஸ்கான் பந்தில் ஸ்டம்புகள் சிதற ஆட்டமிழந்த டோனி

இந்த போட்டியில் டெல்லி அணியில் இடம்பிடித்த இளம் வேகப்பந்து வீச்சாளர் அவேஸ்கான் சென்னை அணியின் தொடக்க ஆட்டக்காரர் டூபிளசி (0) மற்றும் கேப்டன் டோனி (0) ஆகியோரின் விக்கெட்டுகளை வீழ்த்தினார். குறிப்பாக அவேஸ்கான் வீசிய பந்து டோனியின் பேட்டில் பட்டு ஸ்டம்புகளை பதம்பார்த்தது. இந்நிலையில் டோனியின் விக்கெட் வீழ்த்தியது குறித்து அவேஸ்கான் கூறியதாவது:

கனவு நனவானது

3 ஆண்டுகளுக்கு முன்பு டோனியின் விக்கெட்டை வீழ்த்த ஒருமுறை வாய்ப்பு கிடைத்தது. ஆனால் ஒருவர் கேட்சை தவறவிட்டுவிட்டார். தற்போது அவரது விக்கெட்டை கைப்பற்றியுள்ளேன். இதன் மூலம் எனது கனவு நனவானது.

டோனியை வீழ்த்திய மகிழ்ச்சியில் அவேஸ்கான்

நீண்டநாட்களாக டோனி கிரிக்கெட் விளையாடவில்லை. இதனால் அவரை நெருக்கடிக்குள் உள்ளாக்கி விக்கெட் வீழ்த்த நினைத்தோம். அதேபோல் அவர் நெருக்கடியில் சிக்கி என்னிடம் விக்கெட்டை பறிகொடுத்தார். இந்த போட்டியில் சிறப்பாக செயல்பட்டது நல்ல தருணமாக உள்ளது. மேலும் டெல்லியும் போட்டியில் வெற்றி பெற்றது இரட்டிப்பு மகிழ்ச்சி தந்ததுள்ளது.

இவ்வாறு அவர் கூறினார்.