ஜடேஜாவின் ஒப்பந்ததொகையில் 50 சதவீதத்தை பிடியுங்க: ‛சின்னதல’ ரெய்னா ரன்அவுட்டால் ஆக்ரோஷம்

மும்பை, ஏப்.11-

டெல்லி அணிக்கு எதிராக ‛சின்னதல’ ரெய்னாவின் ரன்அவுட்டுக்கு காரணமான ஜடேஜாவுக்கு ஒப்பந்த தொகையில் 50 சதவீதத்தை பிடிக்க வேண்டும் என்ற கோரிக்கை எழுந்துள்ளது.

ரெய்னா அசத்தல்

மும்பையில் நேற்று சென்னை சூப்பர் கிங்ஸ்-டெல்லி கேப்பிட்டல்ஸ் அணிகள் மோதின. தொடக்க வீரர்களான டூபிளசி, ருதுராஜ் கெய்க்வாட் ஆகியோர் உடனடியாக நடையை கட்டினாலும், மொயின் அலி, ரெய்னா ஜோடி பொறுப்பான ஆட்டத்தை வெளிப்படுத்தியது. இருவரும் தேவையான பந்துகளை மட்டும் பவுண்டரி, சிக்சர்களாக விளாசி அசத்தினர்.

மொயின் அலி 36 ரன்களில் வெளியேறினார். ரெய்னாவுடன், ஜடேஜா இணைந்தார். இருவரும் பெரிய பார்ட்னர்கஷிப் அமைப்பார்கள் என ரசிகர்கள் நினைத்தனர். நீண்ட நாட்களுக்கு பின் அணியில் இடம்பிடித்த ‛சின்ன தல’ சுரேஷ் ரெய்னா 36 பந்துகளில் 3 பவுண்டரி, 4 சிக்சர்களுடன் 54 ரன்கள் குவித்தார்.

ரன்அவுட்

அப்போது எதிர்பாராதவிதமாக  ரன்அவுட் ஆனார். அதாவது ஒரு ரன் எடுக்க வேண்டிய இடத்தில் 2 ரன் எடுக்க ஆசைப்பட்டதும், கடைசி நேரத்தில் 2வது ரன் வேண்டாம் என ஜடேஜா கூறியதே ரெய்னா ரன்அவுட் ஆக காரணமாக அமைந்தது.

இந்நிலையில் ‛சின்னதல’ ரெய்னாவை ரன்அவுட் ஆனதால் ரசிகர்கள் கொதித்து எழுந்தனர். ஜடேஜாவை சமூகவலைதளங்களில் சரமாரியாக வசைப்பாடி வருகிறார்கள். 

50 சதவீதம் பிடியுங்க

அந்த வகையில் ரசிகர் ஒருவர், ‛‛ஜடேஜாவின் ஒப்பந்த தொகையில் 50 சதவீதத்தை பிடிக்க வேண்டும்’’ என்றார்.

இன்னொரு ரசிகரோ, ‛‛ஜடேஜா பிற வீரர்களை ரன்அவுட் ஆக்கி விடுவதில் வல்லவர். இது மட்டும் தான் அவரிடம் பிடிக்காத ஒன்று. சரி போகட்டும் சின்னதல இன்னிங்ஸ் ரசிக்கும் படியாக அமைந்தது’’ என குறிப்பிட்டுள்ளார்.

இதேபோல் இன்னும் பல ரசிகர்கள் ஜடேஜாவுக்கு எதிராக சமூகவலைதளங்களில் குரல் கொடுத்து வருகிறார்கள்.